Siit gester abig bini wieder "dihei" in Kristiansand.
Am Mentig abig simer öppe am 5i uf dä Zug nach Bergen. Mit eher müehsamem zwüschestopp in Drammen, en chline vorort vo Oslo. Bis mer den am 12 endlich hend chöne in Nachtzug richtig Bergen istige. Trotz gschenkter Wulldecki, Chüssi und schlafmaske - hani nöd würklich chöne schlafe. wo sölli den au mini blöde füess anetue. Müehsammi nacht nr 1.
Zistig: Akunft in Bergen öppe am 7ni am morge. Hemmer zersch mal müsse dä richtig Bus zu dä Jugendherberg finde. Womer döt acho sind, hemmer die freudig nachricht übercho, das mer scho chönd ichecke und nochli chön aneligge und üs usruebe, bevor mer bergen erkundet.
Zersch hets Coole Zimmer (Kerstin, Dodo, Uwe und ich) aber no gmüetlich Zmörgelet. Aso meh eifach mal ineghaue was so geh het.
Chli aneglege und den isch am 10ni au scho wieder losgange zum bergen erkunde.
zersch natürlich - aker brygge. Uuu huere herzigi hüsli - alli achli windschief. (fotos)
Aber würkli super schön. Leider hemmer genau typisches Bergen wetter verwütscht, heisst: REGE! in berge schint d sunne glaub öppe 100 Täg im Jahr ;)
Mir sind chli dur d stadt glaufe - uf ein vo dä siebe Bergener Huusberge god ussicht gnüsse. Allerdings sind alli eher ziemlich düre und müed gsi drum simmer au scho früä wieder zrugg id Jugendherberg und hend üs döt FETT spagetthi kochet.
Mittwoch: hend mir üs den trennt. Kerstin P., Kerstin B, Dodo, Uwe, Sabine und ich hend üs uf dä Weg gmacht, d stabskirche fantoft und s edvard grieg museum go aluege.
Haltestell Fantoft: Super da isch sicher die glichnahmig kirche - falsch gedacht - no schnell es gruppe foti gmacht und ei haltestell wiiter gfahre namens "paradis" - naja paradisisch ischs nöd gsi was aber nöd nur am schieche wetter glegge isch. Bis mer den mal die Stabskirche gfunde hend, wo zu allem ane au no zue gsi isch simmer scho ziemlich durchnässt gsi.
Wieder zrugg zu dä tramstation und nomel e station wiiter uf "hopp"...
S Edvard Grieg Museum, also Troldhaugen isch scho a dä Station agschriebe gsi, und mir hend alli gfunde ja easy das laufet mir. allerdings simmer sicher e halb stund i dem rege umegspaziert.
s Museum isch ziemlich schön gsi - sis huus wo er mit sinere Frau drin gwohnt het - isch üs vonere nette alte dame erklärt und zeigt worde. Wieder zrugg id bergen innestadt - womer den eigentlich wies büsiwetter zrugg id Jugendherberg gange sind - wills echt ziemlich ziemlich übel gregnet het.
Am gliche abig simmer den icheckt ufs Chrüzfahrtschiff Hurtigruten.
Eigentlich hets nur Seniore und pensionischte gha - plus mir. Da mir gwüsst hend das mir bis am fritig morge uf däm schiff sind - hemmer üs erkundiget womer chönd schlafe (weil wir studenten = kein geld = keine schlafkabine) - dä netti herr a dä reception het gfunde ja Panorama Deck - wenn alli am schlafe sind.
Super hemmer üs grad uf dä Weg gmacht ufs DECK 7, Panorama. WAHNSINN!
d nacht uf dä sofas isch den allerdings nöd sooo wahnsinnig konfortabel gsi. Nacht nummer 2, woni nöd würkli gschlafe han.
Donnstig: dä ganzi tag uf dä fähre. Zwüschestop in ålesund, mer seit die schönsti "stadt" vo norwege. Mir hend wahnsinnig schöns wetter gha und hend üs natürlich das städtli au agluegt.
aber d fotene seget glaub scho ziemlich viel us.
Am drü simmer den wieder zrugg uf üses schiff - wo übrigens so gross isch wienes grosses Huus ;)
i dä zweite nacht hani mi dezue entschlosse ufem bode z schlafe - well d sofas ziemlich schmal sind und ich es wahnsinns fägschnäscht. zwar nacht nummer 3 ohni richtige schlaf - aber besser wie nacht 2 und 1 ;)
Fritig: am sechsi hemmer agleit in trondheim - ich han aber gschlafe bis am 7ni ;) woni den gweckt worde bin vonere nette agstellte und natürlich vom bombastische sunneufgang!!!
denn schnell under duschi ghüpft, zmörgelet ufem schiff und den am 9ni los go trondheim besichtige.
s wetter isch immer immer besser worde und trondheim isch wunderschön. WIESO bini nöd uf trondheim go studiere??? wieso uf krsand. naja d lüüt sind ja immerhin sehr toll da!
Dä Friedhof isch eis vo mine highlights gsi - ziemlich chaotisch und mit dem herbstliecht eifach nur schön zum aluege! d kerstin und dä Dodo hend sich verabschiedet und sind grad direkt uf kristiansand düüst.
Jo i glaub da lahni eu au d Fotene aluege!
Den simmer am fritig abig am elfi wieder uf dä zug richtig oslo. scho womer igstige sind, hets gheisse das mer ungefähr am füfi müend ufen Bus wechsle, weg technische schwierigkeite. Na toll.
Guet i han wieder eimal meh ziemlich gar nöd gschlafe. Nacht nummer 4 ohni jegliche schlaf.
Samstig: am morge früä am halbi siebni simmer den s oslo am bahnhofgstande. und hend ziemlich schnell und mit hilf vo zwei ziemlich nette norweger d jugendherberg gfunde. mir hend natürlich ghofft das mer scho chönd ichecke wie z bergen. Leider nein. aber defür gratis zmorge. wie geil!
mir isch dä appetit allerdings ziemlich ziemlich schnell vergange. wo irgendso en alte grusige glüstler nebet mi aneghoggt isch. was aber noni alles isch. dä het sich ein riise täller mit wurscht (fleischkäs und schinke) voll bigge, den essigkure und leberwurscht. Puh du. und wie dä ghässe het. nach mim erste feine konfibrötli hani echt nüme wiiter esse chöne.
Also mit hunger und keim schlaf simmer den id stadt und hend oslo agluegt. s wetter isch solalala gsi aber es het nöd gregnet.
a dem tag simmer zersch d skisprungschanze holmenkollen go aluege, den ufd museuminsle is FRAM museum. den mit dä fähre uf aker brygge. wieder natürlich - alli ziemli am aschlag - zersch no husch s königshuus go aluege und den chli go käffele und bolle mit wiibeerli esse.
wieder zrugg is hostel, dusche, esse, ab is nescht.
Sunntig: endlich wieder mal richtig chöne schlafe! richtig go zmorge esse, ohni grusigem typ nebet mir. und ab uf oslo - s wetter isch sagehaft schön gsi.
Dä vigelandpark, mit dä nacktestatue go aluege. s Herbstwetter gnosse mit kaffi trinke. nomel uf aker brygge gos wetter gnüsse - am hafe no zu dä opere döt s schönste wc vo welt go usprobiere und chli ufem dach vo dä opere no d herbstsunne go gnüsse.
Bis mer den am 5i üse zug uf kristiansand gha hend.
E wahnsinnig tolli Wuche, wenn au mit wenig bis gar kei schlaf. Aber mit viel schöne Erlebniss und Idrück.
Es paar vo mine idrück chönder under dem Link go aluege.
http://picasaweb.google.com/113192380876577378069/7DaysTonsOfImpressions?authkey=Gv1sRgCL7L5bizva_KgwE&feat=directlink
Keine Kommentare:
Kommentar veröffentlichen